Herdalssetra

Den idylliske Herdalssetra i Norddal har 300 års ubroten setertradisjon, og er  - med sine 300 mjølkegeit - ei av dei største fellessetrane for geit i landet. På setra er det også kyr, sauer og fjordhestar. På Herdalssetra finn ungane eit ekte leikeland med naturlege seteraktivitetar. Setergrenda har eit unikt bygningsmiljø med over 30 gamle seterhus som ligg i klynge. I tillegg mange hustufter etter tidlegare gards- og seterdrift. Inntil byrjinga av 1700-talet var det fast busetnad, og garden si historie går attende til vikingtida.

Gamle tradisjonar blir haldne i hevd med ysting av brun og kvit geitost og produksjon av ekte geitmjølkskaramellar. Her kan du som gjest delta på ei vandring i tid, lukt og smak, der du er innom "den gamle garden" – historia om dei mange gamle hustuftene, gamle sel og fjøs, ysting og smaking av ost, og får informasjon om den "moderne" fellessetra frå 1960.

Herdalen sine mange elver og vatn er varig verna mot kraftutbygging, og byr på fint fiske. Du kan leige båt og prøve fiskelykka. Herdalen har spor etter busetjing frå tidleg fangstkultur, m.a. store fangstanlegg for rein. Kallskaret naturreservat – kjent for spennande geologi - ligg om lag 2 timars fottur frå Herdalssetra, og er også vel verdt eit besøk.